قلبي عليك من الوله ذايب شوق
مشتاق شوق ماتحده مساحه
يسري بدمي شوق يجري بالعروق
يدمي ويسقي من جراحه ..جراحه
ليلي يناظر بالفضا نور وشروق
وليلك يسهرني اناظر صباحه
اصبح ونفسي ياهوى تحن واتوق
وامسي بفكر في غموضه صراحه
اسبق زماني واشفي العوق بالعوق
والقى زماني راح ما راح راحه
يا من ملكت الشوق يامكمل الذوق
يا من عرفت الحب غدوه .. مراحه
كلمه حبيبي خلك بقلبي شفوق
كلمه تزود هالبسيطه ملاحه
كلمه تخلي الكون في حربه يروق
كلمه تشيل الهم تبعد نواحه
هذا خفوقي عن ثرى الذل مرموق
ماباح عن حبه ولا لاح لاحه
لكن تشوف الحب في العين منطوق
نظرة غلا المشتاق فيها سماحه
ولما يذوب الشوق والقلب محروق
تلقى حنايا الروح أوسع براحه
